村上的“跑步咒”

村上春樹的座右銘 ／文．關仁
文章日期：2008年12月14日
【明報專訊】是日也，劉克襄寫有機生活，精彩。
有機蔬菜乃潮流所在，關仁身邊有一些「有機人」朋友，平日挑選食物，幾乎非有機不吃，故亦愛互喊「機佬」、「機婆」、「機妹」、「機弟」等花名，非常鬼馬抵死。不知只是心理作用抑或確係百分百現實，關仁覺得這類朋友的健康狀態比其他人好得多，極少聽聞佢地有什麼傷風感冒，而且仲成日笑騎騎之但係又唔會放毒蛇，可見心境平和開朗之極，一日廿四小時生活在一股「幸福感」之中，想唔令我羡慕到流口水都唔得。
關仁暗暗決定，再過多幾年糜爛生活，幾年之後，喪玩夠了、喪食夠了，便可把精神時間放在「健康生活」之上，到時候，減少工作量，拒絕肉食，只吃有機蔬菜，日日行山，朝朝跑步，甚至立志報名跑馬拉松，同村上春樹鬥個勝負。
之不過，做人，今日唔知聽日事，以關仁之糜爛程度，仲有冇命多活幾年都好成問題，唯有學阿陳四萬 話齋，見步行步，到時候再算。再唔係就應立下更大決心，由此時此刻起馬上改變生活模式，珍惜眼前，不再等待，正如宗教人士經常提醒，千祈唔好以為自己一定長命百歲，非等到臨尾幾年不去信主，因為，魔鬼隨時前來召喚，雙眼一閉，雙腿一伸，來不及講個「信」字便死鬼，咁就後悔莫及。總之一句講哂：只要肯發奮上進，每一秒都可以係新開始！
講到村上春樹，不能不隆重推介佢那本《關於跑步，我想說的是……》。
本報讀書版數周前已介紹過，我立即買來讀，看見村上寫自己如何轉型由一個煙不離手的作家成為一個健康指數爆燈的跑步者，動人之極。村上說，跑步時經常默唸一句話：pain is inevitable，but suffering is optional。那就是說，人生難免有逆境和痛苦，但若能用積極態度面對，並且視之為挑戰，生活便可比較暢順。
值此金融海嘯，大家不妨學村上學習，把這句話印成座右銘。關仁已經這樣做了，你，仲等乜？
[文．關仁]