龍口粉絲﹕香港十個沒打開的抽屜(期待中)

誰來挑戰龍應台？
文章日期：2007年7月15日
【明報專訊】書展殺到埋身，七天之內大大話話有十七、八場論壇演講，確係非常文化。 雖然書展乃香港貿發局所辦，但特區文化事務主要由民政局長負責，所以，「排骨成」好應該多響論壇的聽眾席上現身，同各地作家多交流，替日後開展的文化工作打好基礎。 話時話，以前「肥佬何」儘管日理萬機，可是成日會抽時間去聽文化講座，真係人不可以貌相呀。
講到今次書展講座，陸鈞最感興趣的當然係龍應台場「香港十個沒打開的抽屜」（七月十八日下午三點）。 台灣作家向來文藝，連演講題目亦訂得好有文化 feel，龍教授的「演講精采度」則每次都係爆燈，陸鈞好心急去偷窺一下，龍應台的抽屜裏面到底裝乜東東。
而陸鈞也相信，心急之人不止有我，像《亞洲週刊》專欄作家林沛理就一定亦好想去同龍應台對嘴，因為佢最近出本新書叫做《香港，你還剩下多少？》（次文化堂），深入分析香港文化的特質與變遷，序文內對龍應台眼中的「香港故事」頗不以為然，認為她根本「沒能回應香港社會的某些特點」，所以在文章和演講裏皆略去不提。 此外，筆鋒犀利的林沛理也對包括陳冠中的《我這一代香港人》在內的其他多部香港論述批判甚力，有幾分「拳打港九，腳踢新界」的文化小霸王味道。
如果到時佢坐響台下，即場舉手向龍教授發問，精彩可期，且看會否成事。
文／陸鈞